Mayor Baste target talupan sa kontrata ng GenCorp sa Davao

KABILANG si Davao City Mayor Sebastian “Baste” Duterte sa hanay ng mga testigong nais ng House prosecution na isalang sa witness stand ng Senate impeachment court sa pagpapatuloy ng pagdinig sa inihaing Article II ng impeachment charges laban kay Vice President Sara Duterte sa susunod na linggo.

Ayon kay House impeachment team spokesperson at Lanao del Sur Rep. Zia Alonto Adiong, partikular na uusisain sa alkalde ang naging transaksyon sa Davao City government ng Gencorp Industries Inc., isa sa business interest na idineklara ng bise presidente sa Statement of Assets, Liabilities and Net Worth (SALN) nito.

“So being the mayor now, we would like also to find out kung ano ’yung pwedeng ma-share sa korte,” bungad ni Alonto Adiong.

“These records are still within the City Hall’s records, kasi transaction ’yan, public transaction. It went through the regular competitive bidding,” dagdag niya.

Base sa mga ulat, mula taong 2022 hanggang 2025 ay aabot sa halagang P14.32 million ang naging mga transaksyon ng Gencorp sa pamahalaang lungsod ng Davao.

Kapag napatunayan ito, sinabi ni Alonto Adiong na makikita na mayroong direct business interest ang bise presidente at ang mabigat pa ay pagkakaroon ng transaksyon sa sangay ng gobyerno na pinamumunuan ng kapatid nito.

Sa ilalim ng Article II, inakusahan si Duterte ng pagkakaroon ng hindi maipaliwanag na yaman, maling pagdedeklara ng SALN at hindi pag-divert ng kanyang business interest matapos na maluklok sa mataas na posisyon sa pamahalaan.

Samantala, ihaharap din ng prosekusyon ang ilang opisyal ng Civil Service Commission (CSC) at Securities and Exchange Commission (SEC).

Partikular na magbibigay ng testimonya sina CSC Assistant Commissioner Ariel Ronquillo, tungkol sa SALN preparation and filing guidelines, habang si SEC Company Registration and Monitoring Department Director Gerardo del Rosario ay kaugnay sa business interests ni Duterte.

Kapag natapos na si Del Rosario, si Philippine Government Electronic Procurement System Division Chief Rendell Sopeña ang susunod na ipatatawag para maglabas ng contract records sa mga idineklarang negosyo ng bise presidente.