.. 
NI ROMEO ALLAN BUTUYAN II
Wala maski isa sa anim ng opisyales ng Office of the Vice President (OVP) ang dumalo sa pagdinig ng House Committee on Good Government and Public Accountability kaugnay ng isinasagawang imbestigasyon sa paraan ng paggamit sa pondo ng nasabing tanggapan.
Sa mosyon na inihain ni Manila 3rd District Rep. Joel Chua, inatasan ng komite sa Bureau of Immigration (BI) na ilagay sa Immigration Lookout Bulletin Order sina OVP chief-of-staff Zuleika Lopez, Atty. Lemuel Ortonio, Atty. Rosalynne Sanchez, Gina Acosta, Julieta Villadelrey at Edward Fajarda.
Babala ni Chua isa-cite in contempt ang mga nabanggit na opisyales sakaling mabigo ulit humarap sa susunod House inquiry. Karaniwang kasunod ng contempt ang paglabas ng warrant of arrest.
Paglilinaw ng kongresista, mandato ng kongreso ang pagsasagawa ng motu proprio investigation alinsunod sa tinawag niyang “power of the purse” para tiyakin hindi napupunta sa bulsa ng mga tiwali ang pondo ng OVP, Department of Education at maging sa iba pang ahensya ng pamahalaan.
“Conducting inquiries ay base sa discretion ng Kongreso at ito ay ayon sa Saligang Batas. In fact, in the first and second hearings already conducted by the Committee, the following were seen: Gaps and abuses of Joint Circular No. 2015-01 dahil makikitang mas mahigpit pa ang COA Circular No. 97-002 sa cash advances kumpara sa Joint Circular 2015-001 ng confidential at intelligence funds; – Irregularities in the utilization of confidential fund ng OVP,” diin ni Chua.
Sa kaugnay na balita, naglabas ng rekomendasyon ng komite sa Commission on Audit — amyendahan ang polisiyang nagbibigay ng 180-day period para umapela.
Para kay Chua, masyadong mahaba ang palugit ng COA.
