.. 
INIHAYAG ni House Majority Leader Sandro Marcos na ang kanyang mungkahing pagbasura sa travel tax ay umani na ng suporta mula kay Senate Majority Leader Juan Miguel Zubiri at maging sa panig ng Department of Finance (DoF).
Sa isang kalatas, tiwala ang Ilocos Norte congressman na magiging madali na ang pag-apruba kapwa sa Kamara at Senado ang akdang proposed measure dahil maihahanay ito sa priority bills at pagsusulong sa bicameral committee.
“But I actually had a meeting with Sec. Go of the Department of Finance this morning. Full support po siya sa bill to abolish the travel tax,” wika ni Marcos.
“And he assured me that kung ano man ang pondo na pumupunta ngayon galing sa travel tax sa higher education, ay hahanap sila ng ibang source,” paglalahad ng Presidential son sa isang ambush interview.
“Nag-usap din kami ni Majority Leader Migz Zubiri kaninang umaga and he will be my counterpart in the Senate to file the bill also, I believe today or tomorrow,” kuwento pa ni Marcos.
Ayon sa ranking House leader, isusulong ng dalawang kapulungan na mapabilang sa priority list ng administrasyon ang kanyang House Bill 7443, na naglalayong ipawalang-saysay ang pagpapatupad ng travel tax sa Presidential Decree 1183 at iba pang kaugnay na probisyon hinggil sa Tourism Act of 2009.
Para kay Marcos, hindi na angkop sa kasalukuyang panahon ang pagpapataw ng travel tax dahil sagabal ito sa pagpapalago ng turismo at galaw ng mga tao.
“I mean, honestly, again, it’s outdated, it’s a hassle for traveling Filipinos. We need to boost local and international tourism, and travel tax is not the way to do it. So hopefully, makakatulong po ito sa ating mga kababayan, and of course, to all our visiting tourists,” sambit pa niya.
Hinggil naman sa agam-agam na maapektuhan ng pagbasura sa travel tax ang operasyon ng iba’t-ibang ahensyang nakikinabang sa travel tax collection, tahasang sinabi ni Marcos, na bagamat nirerespeto niya ang posisyon ni Tourism Sec. Christina Frasco, subalit kung titignan ay mayroong negatibong isyu naman ang Tourism Infrastructure and Enterprise Zone Authority (TIEZA) sa paggamit nito ng pondo.
“I respect Sec. Frasco’s opinion, but honestly, TIEZA has an abysmal reputation in terms of absorptive capacity. And actually, the funds that are allocated to it are very scarcely or hardly used as efficiently as possible.”
Ang pag-aalis aniya ng travel tax ay makapagbibigay ng mas malawak na kapakinabangan kaya sa kabuuang halaga ng koleksyon nito, kung saan noong nakaraang taon ay umabot umano sa P7.7 billion.
“I think the multiplier in terms of the economic effects that the abolition of travel tax will have will be much higher than that of the TIEZA allocating the funds that the travel tax goes to for projects that haven’t necessarily had the highest impact.”
Para naman sa punto ng education sector kung saan bahagi ng koleksyon ay napupunta sa Higher Education Development Fund (HEDF), sinabi ni Marcos na ito ay maaaring tugunan sa pagkakaroon ng partikular na probisyon hinggil dito sa mismong General Appropriations Act o GAA. (ROMER R. BUTUYAN)
