.. 
LUBHANG ikinabahala ni Senador Risa Hontiveros ang panibagong pagkaantala sa impeachment trial ni Vice President Sara Duterte kaugnay ng umano’y paglustay ng hindi bababa sa P612-milyong pondo ng Office of the Vice President at Department of Education (DepEd) sa panahon ng kanyang panunungkulan bilang Kalihim.
Sa isang kalatas, hayagang pinalagan ni Hontiveros ang aniya’y paulit-ulit na pagkakaantala sa impeachment trial na dapat sana’y sinimula pagkatapos isimute ng Kamara sa Senado ang Articles of Impeachment noong Pebrero ng kasalukuyang taon.
“Nakakabahala na ang paulit-ulit na antala sa proseso ng impeachment trial. Buwan na ang binibilang natin. Sobra-sobra na ang paghihintay ng mga Pilipino. Let us all hope this is the last delay,” ayon kay Hontiveros.
Sinabi ni Hontiveros na buo ang kanyang suporta sa kasamahan na maipasa ang ilang mahahalagang panukalang batas tulad ng Anti-POGO Bill pero kailangan din tuparin ng Senado ang mandatong nakasaad sa Saligang Batas.
“While I support my colleagues in our shared sense of urgency in passing important legislation in the last days of the 19th Congress, including the landmark Anti-POGO bill, we cannot postpone our constitutional obligations any longer,” dugtong ni Hontiveros.
“Any further delays in commencing the trial against Vice President Duterte would violate the Constitution, which clearly states that the Senate “shall forthwith proceed” with an impeachment trial. Hindi “kapag ready na,” hindi “kapag convenient,” kundi “shall forthwith proceed”. Huwag naman sana yang balewalain,” giit ng senadora.
Aniya, nauna nang nagdesisyon ang Korte Suprema sa pagiging continuing body ng Senado sa lahat ng non-legislative functions nito tulad ng pag-upo bilang mahistrado ng impeachment court.
“The Supreme Court has also previously ruled that the Senate is treated as a continuing body when it comes to non-legislative functions, and those include the vital duty to sit as an impeachment court,” aniya pa.
“We owe it to the Filipino people to convene as an impeachment court and begin the proceedings at the soonest possible time. Anuman ang akusasyon laban kay Vice President Duterte, karapatan ng taumbayan na malaman at mahimay ang mga ito sa pamamagitan ng isang transparent na impeachment trial,” giit niya. “Dapat harapin na ng Senado ang lahat ng ito sa lalong madaling panahon.” (ESTONG REYES)
