.. 
HABANG naghahanda ang bansa sa posibleng pananalasa ng bayong Uwan (international name: Fung Wong), tiniyak ng Philippine National Police (PNP) ang kahandaan tumulong sa paglikas at pagtugon sa sakuna sa mga apektadong lugar sa bansa.
Alinsunod sa direktiba ni Pangulong Ferdinand Marcos Jr., at sa patnubay ng Department of Interior and Local Government, nakipag-ugnayan na ang PNP sa mga lokal na pamahalaan at ahensya ng pamahalaan upang tiyakin ang kaligtasan ng mga mamamayan.
SABAYANG PAGHAHANDA
Ipinag-utos ni Acting PNP Chief Police Lieutenant General Jose Melencio Nartatez Jr. ang paglalagay sa lahat ng yunit ng PNP sa full alert status at ang pakikipagtulungan sa mga lokal na opisyal sa pagpapatupad ng preemptive at kung kinakailangan, mandatory evacuations.
Katunayan aniya, nakikipag-ugnayan na ang mga tauhan ng PNP sa mga LGU at disaster response teams upang matiyak na ang paglikas ng mga pamilyang naninirahan sa mga delikadong lugar. Tutulong din imano ang PNP sa pagpapanatili ng kaayusan, pagbabantay sa mga mahahalagang pasilidad, at pagsigurong ligtas ang mga daanan at evacuation centers.
Binibigyang-pansin ng PNP ang mga rehiyon sa hilaga at gitnang Luzon, kung saan inaasahan ang malalakas na ulan at hangin kapag tuluyang pumasok sa Philippine Area of Responsibility ang bagyo.
24 ORAS NA PAGTUGON
Aktibo na ang mga disaster response team ng PNP sa iba’t ibang rehiyon, at nakapagtatag na rin ng koordinasyon sa Armed Forces of the Philippines (AFP), Philippine Coast Guard (PCG), at Bureau of Fire Protection (BFP).
Ang mga naturang pangkat ay nakahanda na rin para sa mga operasyon ng pagsagip at pagresponde, higit lalo sa mga lugar na madaling bahain o gumuho ang lupa.
Hinimok din ng PNP ang publiko na manatiling kalmado at sumunod sa mga abiso ng kanilang lokal na pamahalaan.
Tiniyak ni Nartatez na patuloy ang kanilang pagbabantay at pagtulong sa mga apektadong lugar upang mapanatili ang kaligtasan ng lahat.
MAGING MAPAGMATYAG
Sa paglapit ng bagyo, nanawagan si Nartatez ng pagkakaisa, disiplina, at kooperasyon mula sa publiko.
Aniya, ang kahandaan at pagtutulungan ng bawat isa ay susi upang mabawasan ang epekto ng kalamidad.
Hinikayat ng PNP sa publiko na manatiling nakaantabay sa mga opisyal na abiso ng PAGASA at ng iba pang ahensya ng pamahalaan upang maiwasan ang pagkalat ng maling impormasyon.
