admin 
NI ESTONG REYES
Sa gitna ng mga agam-agam sa hanay ng mga estudyanteng pasok sa kategorya ng maralita, tiniyak ni Sennador Win Gatchalian na tutugunan ng 2024 General Appropriations Act (Republic Act No. 11975) ang pinangangambahan kakulangan sa pondo ng libreng kolehiyo sa mga State Universities and Colleges (SUCs).
Nasa 2024 GAA ang isang special provision na ipinanukala ni Gatchalian, kung saan nakasaad na maaaring gamitin sa pondo ng libreng kolehiyo ang nalalabing salapi sa ilalim ng Higher Education Development Fund (HEDF).
Gagamitin ang naturang pondo upang punan ang mga kakulangan sa pondo ng libreng kolehiyo sa mga SUCs at ang program of receipts and expenditures, na nakabatay naman sa bilang ng mga enrollees at ang matrikulang inaprubahan ng mga board of regents o trustees ng mga SUCs.
Sa datos ni Gatchalian, aabot sa P4.1 bilyon ang kakulangan sa pondo ng programang libreng kolehiyo.
Ayon sa Philippine Association of State Universities and Colleges (PASUC), tinatayang aabot sa 1.8 milyong mag-aaral ang makikinabang sa libreng kolehiyo ngayong 2024.
Iminungkahi rin ni Gatchalian ang paggamit ng HEDF dahil batay sa datos ng Bureau of Treasury, umabot sa P10.167 bilyon ang accumulated net balance ng naturang pondo noong Mayo 22, 2022 – sapat para punuan ang kakulangan sa pondo ng mga SUCs para sa taong 2024.
Gayunpaman, magagamit ang HEDF para sa kakulangan sa pondo sa taong 2024 lamang.
Para kay Gatchalian, higit na angkop tugunan ang kakulangan sa pondo sa libreng kolehiyo para sa mga SUCs lalo na’t maapektuhan dito ang kakayahan nilang magpatayo ng mga bagong silid-aralan, mga pasilidad, at mga laboratoryo, bagay na nakakaapekto rin sa kalidad ng edukasyong hatid ng mga SUCs.
“Tiniyak natin na para sa taong ito, maiiwasan natin ang kakulangan ng pondo para sa libreng kolehiyo sa ating mga State Universities and Colleges. Mahalagang tiyakin natin ang sapat na pondo para sa ating mga SUCs, hindi lamang para sa libreng kolehiyo, kundi para maipagpatuloy din nila ang paghahatid ng dekalidad na edukasyon para sa ating mga mag-aaral,” ani Gatchalian.
