Romer Butuyan 
PARA lubos na maunawaan ng publiko ang mga pagdinig sa senado, tiniyak ng House prosecution panel na gagawing simple ang paliwanag sa mga nakalap na ebidensya laban kay Vice President Sara Duterte.
Ito ang tiniyak ni House trial spokesman at Lanao del Sur Rep. Zia Alonto Adiong, batay sa napagkasunduan ng 11-member prosecution panel sa paghahanda ng pagsasakdal sa bise presidente.
“What strategies and approaches would we utilize so that not only the senator-judges, but also the general public, can clearly understand and easily digest the evidence being presented,” wika ni Alonto Adiong sa panayam ng One News PH program na Morning Matters.
Ayon kay Alonto Adiong, sisiguruhin ng panig ng tagausig ang tinawag niyang straightforward at fact-driven na presentasyon sa mga ebidensya nang walang anumang political theatrics.
“We will only be dealing with the actual allegations in relation to how we present them in the form of evidence or ideal testimonies without much theatrics,” dagdag ng Lanao del Sur congressman.
“We want to present this as factual, as simple as possible so that our kababayan, ordinary average-minded Filipino would be able to understand it effectively,” saad din niya.
Ang prosecution panel ay binubuo nina House Committee on Justice chair Gerville “Jinky Bitrics” Luistro (Batangas 2nd District), Terry Ridon (Bicol Saro), Rodge Gutierrez (1-Rider), Ysabel Maria Zamora (San Juan City), Lorenz Defensor (Iloilo 3rd District), Chel Diokno (Akbayan), Leila de Lima (Mamamayang Liberal), Kaka Bag-ao (Dinagat Islands), Jonathan Keith Flores (Bukidnon 2nd District), Lordan Suan (Cagayan de Oro City 1st District), at Joel Chua (Manila 3rd District).
Nahaharap si Duterte sa impeachment charges bunsod ng mga umano’y pagwaldas sa P612.5 million confidential funds, pagkakaroon ng unexplained wealth, bribery at corruption ng Department of Education (DepEd) officials, at ang pagtatangka sa buhay nina Pangulong Ferdinand Marcos Jr., First Lady Liza Araneta-Marcos at former Speaker Martin Romualdez.
