Lily Reyes 
SADYANG walang patawad ang mga kawatan. Ultimo farm-to-market roads para sa mga magsasaka, hindi pinalampas.
Ito ang sentimyento ni Agriculture Secretary Francis Tiu Laurel matapos sampahan ng kaso ang ilang opisyal ng Department of Public Works and Highways (DPWH) at mga kontratista sa likod ng walong “ghost” farm-to-market road project sa Davao Occidental.
Ang kabuuang halaga — tumataginting na P94 milyon.
Batay sa reklamo na inihain ng Department of Agriculture (DA) sa Office of the Ombudsman, nagkaroon umano ng sabwatan sa pagitan ng mga tiwaling opisyal ng DPWH at mga kontratista.
Kabilang sa mga inihaing reklamo ng kagawaran ang umano’y korapsyon, malversation, falsification of public documents, grave misconduct, at serious dishonesty.
Ayon sa DA, nabayaran ng buo ang mga kontratista kahit wala naman ginawa ang proyektong pinondohan sa ilalim ng farm-to-market road program ng ahensya.
“The DA remains committed to ensuring accountability and transparency in the use of public funds, particularly in programs intended to benefit our farmers and rural communities,” ani Laurel.
Babala ni Laurel, hindi titigil ang kagawaran hanggat hindi nakukulong ang mga kawatan at kasabwat sa katiwalian.
“We will not stop until everyone involved in this corruption is held accountable for their crimes.”
Sakop ng reklamo ang mga proyekto sa Jose Abad Santos at mga barangay ng Caburan, Culaman, Datu Danwata, Demoloc, Tical, at Manuel Peralta. Nagkakahalaga ang isang kontrata ng P10.02 milyon hanggang P14.92 milyon.
Kabilang sa mga inireklamo sina DPWH Davao Occidental District Engineer Rodrigo Larete, Joel Lumogdang, Michael Awa, Jafel Faunillan, Czar Ryan Ubungen, Harold John Villaver, at mga contractor na konektado sa RDF Construction and Supply, Masulot Construction, YPR General Contractor, Al Handasa Construction, Janmarie Construction, DISEM Construction and Supply, Adan Builders Co., at HVC Sagittarius Commercial and Construction.
