Estong Reyes 
HINIMOK ni Senate President Pro Tempore Panfilo Lacson ang pamahalaan nitong Martes na lampasan ang tradisyunal na “ayuda” at pag-aralan ang mas tiyak at nakatutok na hakbang upang matulungan ang mga Pilipinong apektado tuwing may krisis.
Ayon kay Lacson, maaaring pag-aralan ng gobyerno ang mga ginagawang hakbang ng mga kalapit na ekonomiya tulad ng Taiwan, na gumagamit ng subsidy mechanism upang mabawasan ang epekto ng biglaang pagtaas ng presyo ng langis.
“Hindi ako nagmamarunong. Ang suggestion ko lang, pag-aralang mabuti kung anong mas nakakabuti sa sektor na talagang apektado,” aniya sa panayam.
Dagdag niya, kung makakakolekta ang pamahalaan ng sapat na buwis upang punan ang posibleng pagkawala ng kita mula sa pagsuspinde ng excise tax sa produktong petrolyo, maaaring ilaan na lamang ang katumbas na halaga para sa targeted subsidy.
Batay sa datos ng Department of Finance, maaaring umabot sa P200.899 bilyon ang nawawalang kita sa 2027 kung sususpindihin ang excise tax sa mga produktong petrolyo, at karagdagang P119.326 bilyon kung isasama ang pagsuspindi ng value-added tax — o kabuuang P320 bilyon kung parehong excise tax at VAT ang ipatutupad na suspensyon.
Hinimok din ni Lacson ang pamahalaan na isaalang-alang ang mekanismo ng tulong kahit sa mga sitwasyon na hindi umabot sa antas na magpapagana ng awtomatikong suspensyon ng fuel excise tax.
“Pag-aralan lang, isama sa consideration sa halip mag-suspend kasi di naman ito maski pumalo ng $100 per barrel sa world price pwedeng di ma-suspend pero ang revenue na di mawala, baka pwedeng pag-aralan para ilagak kung saan ang direktamenteng apektado ng presyo yan ang makikinabang. At di lang may kotse ang makikinabang,” aniya.
Muling iginiit ni Lacson ang panawagan para sa mas maikling monitoring period bilang batayan ng pagsuspinde ng excise tax sa langis, dahil sa “extraordinary situation” na sanhi ng krisis sa Gitnang Silangan na nagtulak sa mabilis na pagtaas ng presyo ng langis sa pandaigdigang merkado.
Sa kabilang banda, sinabi niya na kailangang lampasan ng pamahalaan ang “ayuda,” lalo na kung naaapektuhan ang pagpapatupad ng nasabing programa dahil sa pamumulitika.
“Parang nahirati tayo sa ayuda. Kung ia-analyze natin context muna, ang nabigyan ng ayuda, hindi naman ito ang apektado ng gasolina. Ito ang matagal nang nakalista. Ang masama nito, implementation—minsan mga leaders ng local government officials ang nakatala kasi nanggagaling sa barangay ang listahan,” aniya.
“So totoo bang naibsan ang kahirapan sanhi ng pagtaas ng oil, presyo ng langis, ang ating kababayan na talagang apektado? Transport sector, ordinary commuters, tataas,” dagdag niya.
“Dapat i-review din ng ating pamahalaan kung ano talaga ang nararapat na tugon na direktamenteng makatulong sa direktang apektado ng pagtaas ng presyo ng langis.”
