Romer Butuyan 
PUSPUSAN ang paghahanda ng 11-member House prosecution panel sa nakatakdang pagharap sa Senate impeachment court para iprisinta ang mga reklamo laban kay Vice President Sara Duterte.
Ayon kay lead House prosecutor at Batangas Rep. Gerville “Jinky Bitrics” Luistro, ang proseso ng pagbusisi sa hawak na ebidensya at testigo, kasama na ang pag-aaral sa tamang hakbang sa bawat pagdalo sa impeachment trial at pagsalag sa argumento ng kabilang kampo ay maikukumpara sa pagkuha ng bar exam.
Ginawa ni Luistro ang pahayag nang makapanayam ng Kongreso Ngayon @ Your Service program nina Manila Rep. Bienvenido Abante at veteran broadcaster Ed Sarto sa DZME Radyo TV.
“As a matter of fact, ang aking analogy para kaming bumalik sa bar exam,” wika ni Luistro.
“All of us are lawyers so medyo familiar naman kaming lahat sa pinagdaanan namin. Natatawa na lang kami on what is happening to us because apparently talagang para kami mga law students na bumalik sa review ng Bar,” dagdag pa ng chairperson ng House Committee on Justice, na namahala sa pagdinig ng impeachment charges laban sa bise presidente sa Kamara.
Kasama ni Luistro na prosecution team sina partylist Reps. Terry Ridon (Bicol Saro), Ramon Rodrigo Gutierrez (1-Rider), Jose Manuel “Chel” Diokno (Akbayan), at Leila de Lima (Mamamayang Liberal). Bahagi rin ng koponan sina Reps. Ysabel Maria Zamora (San Juan City), Lorenz Defensor (Iloilo 3rd District), Kaka Bag-ao (Dinagat Islands), Jonathan Keith Flores (Bukidnon 2nd District), Lordan Suan (Cagayan de Oro 1st District), at Joel Chua (Manila 3rd District).
Nauna nang inihayag ni Luistro ang magiging lead ng bawat grupo na natokahan sa bawat isang impeachment articles na ipiprisinta sa trial proper.
Sa ngayon ani Luistro, aisinasapinal na ang hanay ng mga testigo, documentary evidence at maging video evidence, at presentation strategies ng bawat isang article of impeachment.
“We are finalizing of course the list of our witnesses per article. We are finalizing the list of documents to be presented per article,” ayon sa Batangas solon.
“‘Pag sinabi natin documents it does not pertain to paper only, it includes even videos and we are also finalizing the nature of the direct examination na dapat naming gawin in order to establish our case per witness per article,” saad pa ni Luistro.
Masusi rin aniyang pinag-aaralan ang rules on evidence dahil karamihan umano sa miyembro ng kanilang grupo ay limitado lang ang naging karanasan sa law practice.
