.. 
PITONG matataas na opisyal ang kasama sa pinakabagong balasahan ng Philippine National Police (PNP).
Sa isinagawang press briefing sa Kampo Crame, kabilang sa mga tinukoy ni PNP Spokesperson Brig Gen Jean Fajardo ang pagtatalaga bilang acting Deputy chief for Operation kay Police Major Gen Robert Rodriguez, dating Area Police Commander ng Visayas.
Ito ay matapos na magretiro bilang number 3 man ng PNP si Lt. Gen John Michael Dubria nitong Disyembre 20, 2024 sa hudyat ng ika-56 na kaarawan na hudyat ng mandatory retirement alinsunod sa batas na lumikha ng PNP.
Samantala itinalaga naman bilang OIC Directorate for Information and Communication and Technology Management (DICTM) si Brig. Gen.Jerico Baldeo habang si Brig. Gen. Christopher Abrahano ay hinirang naman mangasiwa sa Police Regional Office (PRO) Caraga.
Si Brig. Gen. Christopher Abecia ang bagong officer-in-charge ng Aviation Security Group.
Itinalaga din bilang acting deputy director ng Police Community Relations si Brig. Gen. Roy Parena habang si Brig. Gen. Dionisio Bartolome naman ay itinalaga bilang director for administrator ng Central Visayas Regional Police Office. (Edwin Moreno)
