.. 
MATAPOS na mabuking na walang anumang rekord ang nagngangalang Mary Grace Piattos na ginamit sa liquidation report ng Office of the Vice President (OVP), hiniling ng ranking official ng Kamara ang Philippine Statistics Authority (PSA) na silipin din ang iba pang pangalan ng taong di umano’y tumanggap ng confidential funds ni Vice President Sara Duterte.
“The revelation that Mary Grace Piattos is a fictitious identity raises serious red flags. The PSA must immediately audit and verify all the names appearing in the ARs submitted by the OVP to the Commission on Audit,” hirit ni Deputy Majority Leader at La Union 1st District Rep. Paolo Ortega V.
Sa isinumiteng sertipikasyon ng PSA House Blue Ribbon Committee, lumalabas na walang anumang impormasyon sa kapanganakan, kasal o pagkasawi ang pangalang nakapirma sa acknowledgement receipts na bahagi ng liquidation report na ipinasa ng OVP sa COA para sa paggastos ng ₱500-million confidential funds sa apat na quarter mula sa huling bahagi ng 2022 hanggang taong 2023.
“This isn’t just an isolated case. If a fabricated name was used to justify millions of pesos in spending, it undermines the integrity of public accountability. It also raises the question: how many more fake names might be buried in those ARs?” sabi pa ni Ortega.
Mungkahi ng La Union solon sa PSA, i-cross check din ang mga pangalan ng iba pang lumagda sa ARs na ginagamit na patunay ng OVP para bigyang katwiran ang pagkaubos ng naturang pondo.
Kabilang sa mga pinapasilip ang mga pangalang Kokoy Villamin, Fernando Tempura, Reymunda Jane Nova, at Carlos Miguel Oishi.
Sa panig nina Assistant Majority Leader Rep. Jude Acidre, ng TINGOG Partylist at Bataan 1st District Rep. Geraldine Roman, kapwa nila sinegundahan ang panawagan ni Ortega sa anila’y alingasngas sa paggamit ng daan-daan milyong confidential funds ni former Education Secretary at Vice President Sara Duterte, kapwa sa ilalim ng OVP at Department of Education (DepEd).
Ayon kina Acidre at Roman, posibleng “tip of the iceberg” lamang ang nabistong paggamit ng pekeng pangalan para hindi mabisto ang pinag gamitan ng P612.5 million confidential funds.
“Hindi lamang si Mary Grace Piattos ang problema. Tip of the iceberg lang siya,” giit ni Acidre.
Base sa sertipikasyon ng PSA para sa Mary Grace Piattos, malinaw anilang mayroong fraud o panloloko na ginawa ang OVP.
“When you submit documents to the COA na merong taong nagngangalang Mary Grace Piattos, na magja-justify ng certain gastos pero mapatunayan mong wala, parang merong element of fraud doon,” sambit naman ni Roman.
“Kung walang Mary Grace Piattos, lahat ng dokumentong pinirmahan ni Mary Grace Piattos ay huwad at hindi makatotohanan,” dugtong niya. (Romeo Allan Butuyan II)
