.. 
ISANG buwan matapos lisanin ni dating Public Works and Highways Secretary Rogelio Singson ang Independent Commission for Infrastructure (ICI) si Rossana Fajardo naman ang nagsumite ng letter of resignation.
Sa isang pahayag, nilinaw ni Fajardo na tapos na ang kanyang trabaho bilang punong abala sa financial oversight ng imbestigasyon sa mga infrastructure projects ng Department of Public Works and Highways (DPWH).
“I have completed the work I set out to accomplish when I was appointed, ensuring that the foundational goals of the Commission have been met,” saad sa isang bahagi ng liham ni Fajardo kay Pangulong Ferdinand Marcos Jr.
Para sa nagbitiw na commissioner, mas angkop na ipagpatuloy ng Department of Justice (DOJ) at Office of the Ombudsman ang imbestigasyon sa mga proyekto ng pamahalaan.
“I believe that the investigative and prosecutorial responsibilities will now transition to other agencies, such as the Department of Justice and the Office of the Ombudsman, which are better positioned to ensure accountability for contractors and government officials.”
Samantala, hinikayat ni Fajardo ang Palasyo na ikonsidera ang panukalang paglikha ng mga permanenteng komisyon laban sa katiwalian sa imprastraktura, tulad ng Independent Commission Against Infrastructure Corruption at Independent People’s Commission.
“It has been a profound honor to serve alongside individuals who are deeply committed to transparency and accountability, dedicating themselves selflessly to the Filipino people,” dugtong ni Fajardo.
Samantala, tiniyak ng ICI na magpapatuloy ang mga hakbang na naglalayong mapanagot ang mga sangkot sa maanomalyang flood control projects.
Ayon kay ICI Chairman Andres Reyes Jr., nakatutok ang komisyon sa pagrepaso sa mga rekomendasyon na isusumite sa Office of the Ombudsman para tiyakin malakas ang kasong ihahain ng gobyerno sa mga tiwaling opisyal ng pamahalaan, gayundin sa mga kontratistang bahagi ng kuntsabahan.
Ibinida rin ni Reyes ang nagawa ng komisyon, kabilang ang pagsasampa ng kaso sa halos 100 indibidwal kabilang ang ilang senador, kongresista, mga DPWH officials, mga kontratista, at maging isang kasalukuyang opisyal ng Commission on Audit (COA).
Sa datos ng ICI, 16 na indibidwal na sangkot sa tinaguriang flood control scandal ang dinakip at kasalukuyang nakapiit — bukod pa sa humigit kumulang P20.3-billion “frozen assets.” (LOUIE LEGARDA)
