.. 
HINDI pa man nagtatagal sa pwesto, agad na sinibak ng Palasyo si Commissioner Reymar Mansilungan ng Senior Citizens Commission bunsod ng sandamakmak na bulilyaso.
Kabilang sa mga reklamong isinampa Miguelito Garcia laban kay Mansilungan ang serious dishonesty, grave misconduct at conduct prejudicial to the best interest of the service.
Batay sa dokumentong nilagdaan ni Executive Secretary Lucas Bersamin, lumalabas na pineke umano ni Mansilungan ang mga isinumiteng credentials para matugunan ang “minimum requirements” sa mga aplikante sa posisyon ng commissioner para sa nasabing ahensya.
Sabit din umano sa pera ang naturang opisyal.
“Reymar R. Mansilungan is hereby found administratively liable for serious dishonesty, grave misconduct, and conduct prejudicial to the best interest of the service and meted out the penalty of DISMISSAL from the service with all its accessory penalties,”saad sa huling bahagi ng kalatas ni Bersamin.
Panawagan ng Palace official sa iba pang nasa gobyerno, dapat manatiling tapat ang mga opisyal at kawani ng pamahalaan, kasabay ng giit sa kahalagahan tupdin ang mandatong nakapaloob sa Code of Conduct and Ethical Standards for Public Officials and Employees.
Para kay Bersamin, mahalaga ang integridad sa mga nagtatrabaho sa pamahalaan. Wala rin aniyang puwang sa gobyerno ang mga manloloko.
Pebrero ng nakalipas na taon nang suspindihin ni Bersamin si Mansilungan bunsod ng maling paggamit ng pondo ng ahensya.
