.. 
PARA kay Senate Committee on Agriculture, Food and Agrarian Reform chairman Francis Pangilinan, napapanahon nang tuldukan sa bisa ng isang “all-our war” ang pamamayagpag ng mga negosyanteng pumapatay sa kabuhayan ng mga magsasakang Pinoy.
Ginawa ni Pangilinan ang pahayag matapos pangunahan ang pagsusuri sa dalawang 40-foot containers na kargado ng smuggled agricultural products sa Manila International Container Port (MICP) nitong Lunes, Oktubre 27.
“Ang mahalaga dito ay nagtutulungan ang ating Committee on Agriculture sa Senado at ang BOC (Bureau of Customs). Interestingly enough, ako ay naging chairman ng Senate Committee on Agriculture ng end of July at si Commissioner Ariel Nepomuceno naman ay naging commissioner (ng BOC) beginning July,” ayon kay Pangilinan.
Bilang chairman ng naturang komite, pinangunahan ni Pangilinan ang pagsasagawa ng public hearing sa kalagayan ng sektor ng agrikultura ng Pilipinas, gayundin ang epekto ng smuggling sa magsasaka, mangingisda, ekonomiya at mga konsyumer.
Nitong Lunes pinangunahan ni Pangilinan at BOC Assistant Commissioner Vincent Philip Maronilla ang inspection sa dalawang containers na may misdeclared frozen chicken breasts at fish balls sa MICP.
Tinatayang aabot sa halagang P12.96 milyon ang kargamentong idineklara bilang fish ball. Subalit nang suriin, tumambad ang sako-sakong frozen chicken breasts.
Kamakailan, anim na indibidwal ang kinasuhan ng contempt sa Senado at ikinulong Kabilang ang broker at isang BOC deputy collector ng Port of Subic—dahil nabigo silang makipagtulungan sa imbestigasyon ng komite laban sa talamak na agricultural smuggling na nangyayari sa daungan ng bansa.
“If at all, that’s an indicator of how serious we are, how serious the BOC is. We have been coordinating with the BOC since Day One of our smuggling hearings. They have been providing us with the necessary documents and information,” aniya.
Ibinahagi rin ng senador ang pakikipag-ugnayan ng komite sa Office of the Ombudsman, Department of Justice (DOJ), at National Bureau of Investigation (NBI) para sa pagsasampa ng kasong Anti-Agricultural Economic Sabotage Law.
“Ang lakas ng loob nilang ipasok (at) gumawa ng kalokohan. Is this salvaged value? Ibig sabihin, binili sa China, dapat itapon na, pero dahil mura dadalhin dito tapos lilinisin – ganon ba ang sistema?,” aniya.
“We want to check kasi yung ganon. Don ngayon pumapasok yung sakit.” (ESTONG REYES)
