.. 
POSIBLENG nasa balag ng panganib ang isang kongresista matapos ipakulong ang opisyal ng Department of Public Works and Highways (DPWH) na nagtangkang manuhol para awatin ang imbestigasyon sa maanomalyang flood control projects.
Sa isang pahayag, pinayuhan ni Senador Ping Lacson si Batangas 1st District Rep. Leandro Legarda Leviste na bigyang-prayoridad ang sariling kaligtasan lalo pa aniya’t hindi pipitsugin ang sindikatong kinabibilangan ng DPWH official na pina-entrap ng bagitong kongresista.
Sa impormasyong ibinahagi ng Calabarzon regional police, dinakip kamakailan si District Engineer Abelardo Calalo ng DPWH Batangas First Engineering District.
Batay sa imbestigasyon ng pulisya, tinanggihan — at pinadampot ni Leviste si Calalo na naghatag ng mahigit P31 milyong cash para sa pananahimik ng kongresista.
“Exactly what I advised Sen. Loren when I informed her about Cong. Leviste’s unusual feat as a neophyte congressman — that her son must always mind his security,” wika ni Lacson.
“Billions of public funds are involved or at stake in a game he’s in and that he cannot underestimate evil,” pagtatapos ng senador na nagsilbing Philippine National Police chief bago nahalal bilang mambabatas.
