.. 
Ni ROMEO ALLAN BUTUYAN II
PARA kay SAGIP Partylist Rep. Rodante Marcoleta, isang palabas lamang ang alok na bank waiver ni Commission on Elections (Comelec) chairman George Erwin Garcia kaugnay ng $15.2 milyong nakadeposito sa mga foreign banks.
Sa isang pahayag, ipinaliwanag ni Marcoleta na hindi saklaw ng isang pirmadong bank waiver ang mga offshore dollar accounts sa ibang bansa kung saan di umano nakadeposito ang P120 milyong suhol ng South Korean automated elections system provider na Miru Systems Co. Ltd.
Ayon Marcoleta, malinaw na diversionary tactics o panlilito lamang sa tunay na isyu ang tugon ni Garcia matapos mabulgar ang mga di umano’y foreign bank accounts ng isang top Comelec official.
Una nang itinanggi ni Garcia ang pasabog ni Marcoleta, kasabay ng giit na isa lamang aniyang demolition job ang ibinulgar ng kongresista.
“Garcia’s claim is a diversion, a red herring to say the least. Why would anyone even attempt to demolish a constitutional body?,” wika ng batikang mambabatas.
Sa ilalim aniya ng Republic Act 1405 na mas kilala sa tawag na Bank Secrecy Act, ang isang valid waiver ay maaari lamang gamitin sa banking institutions na nag-o-operate sa bansa.
“In the case of offshore bank accounts, a court order is required to compel a foreign jurisdiction to look into suspicious transactions,” hirit ng SAGIP partylist solon.
“That being the case, any inquiry or investigation into these reported accounts in foreign banks that are beyond Philippine jurisdiction, or any transaction made in regard to such accounts, must require the involvement of their foreign governments, and shall be subject to the respective bank secrecy laws of such foreign jurisdictions,” dugtong ni Marcoleta.
Sa pananaw ni Marcoleta, walang silbi ang waiver ni Garcia sa alinmang domestic law enforcement at investigative agencies, gaya ng Anti-Money Laundering Council (AMLC), National Bureau of Investigation (NBI), Office of the Ombudsman, at iba pa kahit binigyan ng mandato ng Constitution at Philippine laws.
“Even RA 9160, or the Anti-Money Laundering Act, limits the power of the AMLC to merely making a request to any foreign state for assistance, and subject still to limitations that the laws of foreign states may impose,” sabi pa ni Marcoleta.
Bunsod nito, hinimok ni Marcoleta si Garcia na masusing makipagtulungan sa Kamara sa pagsasagawa ng imbestigasyon hinggil sa kuwestyunableng offshore bank accounts kung saan pinaniniwalaang pumasok ang bribe money mula sa nasabing South Korean firm na ginawaran ng Comelec ng P18-billion contract para sa pagsasagawa ng automated 2025 mid-term elections.
“Thus, if Chairman Garcia is willing to cooperate, the rest of the Comelec’s commissioners should also be encouraged to come forward to prove their own — and ultimately the entire poll body’s innocence,” panawagan pa ng kongresista.
Kamakailan lang nang ibinunyag ni Marcoleta ang pagbubukas ng nasa 14 bank accounts sa Cayman Islands sa Caribbean, China, Hong Kong, North America at Singapore, ng isang hindi nitong pinangalanan na mataas na opisyal umano ng Comelec.
Ang naturang offshore bank accounts ay naglalaman ng kabuuang US$15.2 million (katumbas ng halos ₱1 bilyon, sa iba’t-ibang currency. Dagdag pa ni Marcoleta, ang poll body official na ito ay mayroong kabuuang 49 offshore bank accounts sa nasa 18 global banks.
Ani Marcoleta, pumasok sa mga naturang offshore accounts nasa US$2.1 million (₱120-M) na deposits, mula sa indibidwal na may kaugnayan sa Miru, sa panahong kinakailangang magpasya ang Comelec sa gagawaran ng kontrata sa para sa automated election system (AES) ng national at local elections sa susunod na taon.
