.. 
NAMUMURONG madagdagan na naman ang kasong kriminal ng puganteng lider ng Kingdom of Jesus Christ (KOJC) matapos mabisyo n Anti-Money Laundering Council (AMLC) ang nasa 330 financial transactions sa mga bank accounts ni Pastor Apollo Quiboloy.
Batay sa pagsusuri ng AMLC, hindi “barya” ang halaga ng bawat transaksyon na di umano’y nangyari mula Disyembre 2006 hanggang Pebrero 2022.
Ayon sa AMLC, nagsimulang magtala ng malakihang pagpasok ng pera sa mga naturang bank accounts mula 2007 hanggang 2018. Kapansin-pansin din anila ang agad na pagwi-withdraw ng pera sa mismong araw na nangyari ang pagdedeposito.
“These funds appear to be directly sources from the unlawful activities of Quiboloy, his cohorts and his church,” ayon sa AMLC na ang tinutukoy ay ang KOJC na itinatag ni Quiboloy.
Sa isang pagkakataon pa anila, may pumasok na mahigit sa P15-milyong pera sa bank account ni Quiboloy. Kinabukasan, inilabas lahat ng puganteng pastor ang naturang halaga.
“In view of the period of the transactions and the report of cash smuggling, it is highly probable that the said amounts deposited and withdrawn are the proceeds of the alleged bulk cash smuggling,” ayon sa AMLC.
Pinakamalaki di umano ang transaksyon ni Quiboloy noong 2015 kung saan umabot sa P89 milyon ang pumasok at agad na inilabas sa bank account ng dating Presidential Spiritual Adviser.
“As to the period, Quiboloy’s financial transactions were highest during the years 2015 to 2018,” pahayag pa ng AMLC.
Una nang naglabas ng freeze order ang Court of Appeals sa mga ari-arian at bank accounts ni Quiboloy, KOJC, at Sonshine Media Network Inc. (SMNI), gayundin sa iba pang personalidad na pinaniniwalaang kakuntsaba ng pastor.
Nananatiling mailap si Quiboloy na nahahanap sa mahabang talaan ng kasong kriminal sa Pilipinas at maging sa Estados Unidos. Sa mga naturang asunto, tatlo ang no bail – human trafficking, rape at money laundering.
