admin 
MATAPOS ang anim na taon ng pagdinig, ganap nang pinawalang-sala ng Muntinlupa City Regional Trial Court si dating Senador Leila De Lima kaugnay ng kasong droga na isinampa ng Department of Justice (DOJ) sa ilalim ng nakaraang administrasyon.
Sa desisyon ng Muntinlupa RTC Branch 204, inabswelto si De Lima sa kasong paglabag ng Section 5 ng Comprehensive Dangerous Drugs Act na inihain ng noo’y Justice Sec. Vitaliano Aguirre.
Bago pa man lumabas ang desisyon ng Muntinlupa RTC Branch 204, una nang ibinasura ng korte ang isa pang kaso laban sa dating senador.
Gayunpaman, mananati sa kustodiya ng Philippine National Police (PNP) si De Lima bunsod ng nakabinbing kaso sa Muntinlupa RTC Branch 256.
Naghain na rin ang kampo ni De Lima ng petisyon para makapaglagak ng piyansang magbibigay-daan sa pagwawakas ng mahigit anim na taong pananatili sa piitan.
