Fast food business ni Sara, tiba-tiba sa 49 kontrata

HINDI bababa sa 49 kontratang may kabuuang halagang P35.87 million ang nasungkit umano ng kumpanyang pinaniniwalaang pag-aari ni Vice President Sara Duterte.

Sa pagpapatuloy ng paglilitis ng Senate impeachment court, partikular na tinukoy ni Philippine Government Electronic Procurement System (PhilGEPS) Division Chief Rendell Sopeña ang GenCorp Industries Inc. na kabilang sa mga negosyong idineklara ng pangalawang pangulo sa isinumiteng Statement of Assets, Liabilities and Net Worth (SALN).

“We searched the repository of procurement data based on the requested merchant name, which is GenCorp Industries Inc. The search resulted in 49 awarded contracts to GenCorp,” wika ni Sopeña.

“The composition of the 49 awarded contracts is one contract awarded by OWWA Region XI, 33 contracts awarded by PhilHealth Region XI, and 15 awarded contracts by the City of Davao,” dagdag niya.

Saklaw ng mga nasabing kontra ang panahon ng panunungkulan ni Duterte bilang pangalawang pangulo — mula umano noong Hulyo 21, 2022 hanggang June 23, 2026.

Idinetalye rin ni Sopeña na sa Davao City pa lang, pumalo na sa P34.2 milyon ang kabuuang halaga ng kontratang nasungkit ng GenCorp. Nakakuha rin umano ng P1.33 million contract ang GenCorp sa PhilHealth, gayundin sa Overseas Workers Welfare Administration regional office.

Ayon naman kay House lead prosecutor at Batangas Rep. Gerville Luistro, ang lahat ng bids and awards ng City of Davao, OWWA at PhilHealth ay nangyari pawang noong panahon panunungkulan ni Duterte bilang bise presidente.

Kapansin-pansin din aniya na ang mga transaksyon ng GenCorp Industries Inc, sa tatlong ahensya ng gobyerno ay nangyari sa panahong idineklara ni Duterte sa kanyang SALN ang pagkakaroon ng shares of stocks sa sa nabanggit na kumpanya.

“The impeachment court already heard our witness from the Ombudsman on the 2024 and 2025 SALNs, where the respondent Vice President herself declared that she is a shareholder of GenCorp Industries Incorporated.”