.. 
PARA sa lider ng mayorya sa Senado, marapat lang simulan agad ang pagdinig sa impeachment case laban kay Vice President Sara Duterte, alinsunod sa probisyong kalakip ng 1987 Constitution.
Sa isang liham na ipinadala sa tanggapan ni Senate President Francis Escudero, partikular na pinaalalahanan ni Senate Minority Floor Leader Aquilino Pimentel III ang mandato ng Senado.
Partikular na tinukoy ni Pimentel ang Section 3, paragraph 4 ng Article XI ng umiiral na Saligang Batas kung saan sinasabing “In case the verified complaint or resolution of impeachment is filed by at least one-third of all the Members of the House of Representatives, the same shall constitute the Articles of Impeachment, and trial by the Senate shall forthwith proceed.”
Binigyang-diin rin ni Pimentel ang kahulugan ng salitang “forthwith” – agaran.
“The above elaboration affirms that it is the Senate’s duty to act on the impeachment case of Vice President Sara Duterte ‘without any delay’ or ‘without interval of time.’ I repeat that this is the Senate’s DUTY,” ani Pimentel sa liham kay Escudero.
Nito lamang nakalipas na Lunes, inihayag ng Korte Suprema na nai-raffle na ang petisyon naglalayong atasan ang Senado na simulan ang impeachment trial laban kay Duterte.
Noong nakaraang Pebrero 5, inindorso ng 215 kongresista ang impeachment complaint laban kay Duterte saka isinumite sa Senado noong araw na iyon ang pitong Articles of Impeachment.
Gayunpaman, hindi na nagawang talakayin pa sa Senado ang impeachment case bunsod ng adjournment ilang oras bago pa man ganap na natanggap ng senado ang sipi ng reklamo.
Samantala, tiniyak na rin ni Escudero ang pagtalakay ng reklamo — pero sa buwan pa ng Hunyo sa ilalim ng 20th Congress. (ESTONG REYES)
