
Ni Lily Reyes
INIANUNSIYO kahapon ng Philippine Health Insurance Corporation (PhilHealth) na patuloy pa rin ang kanilang operasyon, mga transaksyon at claim sa pamamagitan ng over the counter method ng kanilang sangay sa Mother Ignacia, Quezon5 City.
Ito ay matapos ma-infect ng Medusa ransomware ang mga sistema ng state health insurer na Philippine Health Insurance Corp. (PhilHealth) noong Sept. 22.
Nabatid na humingi ng $300,000 o humigit-kumulang P16 milyon ang mga cyberhacker, ayon sa Department of Information and Communications Technology (DICT).
Una nang kinumpirma ng (DICT na may impormasyon na sila tungkol sa grupong nasa likod ng cyber attack sa PhilHealth. Binanggit ni DICT Undersecretary Jeffrey Dy na kilala na umano nila ang nasa likod ng pag-hack ng impormasyon ng PhilHealth at ang nagde-demand ng ransom kapalit nito.
Gayunman, ayon kay Dy ay hindi pa umano nila ito masasampahan ng kaso dahil kailangan na ma-identify muna ang mga pangalan ng mga hackers.
Kasabay nito, pinuri naman ng DICT ang Philhealth sa agarang pag-turn off sa online access at sa coordination nito sa National Computer Emergency ng DICT.
Babala ng DICT, maaaring gamitin ng hackers ang mga nakuhang impormasyon para sindakin ang publiko at makuha nila ang hinihinging ransom.
Pinapayuhan naman ang mga miyembro at ang kanilang mga dependent na magpakita ng kopya ng kanilang PhilHealth identification card, member data record, o iba pang mga sumusuportang dokumento upang ma-access ang mga benepisyong online system nito.