.. 
TIMBOG sa mga operatiba ng National Bureau of Investigation (NBI) ang anim na indibidwal matapos salakayin ang isang illegal quarry operation sa baybaying bayan ng Morong sa lalawigan ng Rizal.
Ayon sa NBI-Environmental Crime Division (NBI-EnCD), isang impormasyon ang natanggap ng kawanihan kaugnay ng bentahan ng graba sa bayan ng Morong.
Nang beripikahin sa Provincial Mining Regulatory Board (PMRB) ng Rizal at Department of Environment and Natural Resources–Mines and Geosciences Bureau Region IV-A (DENR-MGB), napag-alamang walang quarry permit na inisyu sa operator na kinilala sa pangalang Randy Molod Efsiaca ng Efsiaca Construction Supplies Trading.
Wala rin anilang maski isang Mineral Production Sharing Agreement, Industrial Sand and Gravel Permit, o anumang quarry permit sa nasabing munisipalidad.
Bagamat kumpiskado sa mga operatiba ang dalawang dump truck at dalawang backhoe, hindi naman inabutan ang sinasabing ooperator ng illegal quarry. Pawang backhoe operators at dump truck drivers na sina Armando Orinas, John Robert Gonzales, Erven Icalabis, Rodel Celemencia, Alexander Catan at Nestor Cadavez ang nadakip sa nasabing operasyon.
“Illegal quarrying not only depletes our natural resources, but also poses serious risks to public safety, such as landslides, flooding, and long-term environmental degradation,” saad sa isang bahagi ng pahayuag ng NBI.
