admin 
SIYAM na puganteng tumakas kamakailan mula sa piitan ng Malibay Police Sub-Station sa lungsod ng Pasay ang nadakip sa puspusang manhunt na ikinasa ng pulisya.
Sa pahayag ng Southern Police District (SPD), kabilang sa mga nasa kustodiya na ulit ng pulisya sina Norman Deyta, Carlo Magno at Romeo Estopa matapos timbugin ng mga operatiba.
Pasok din sa talaan ng mga naibalik sa loob ng selda sina Christian Salvatierra, Joey Hernandez, Eden Garcia, Tirzo Galit, Joshua Panganiban at John Michael Cabe.
Patuloy naman ang paghahanap sa isa pang puganteng kinilala sa pangalang Richard Dela Cruz.
Dakong alas 4:30 ng madaling araw noong Lunes nang makatakas ang mga detainees na gumamit ng lagare sa kanilang pagpuga. Bago pa man lisanin ang istasyon ng pulisya, ginulpi, dinisarmahan at ninakawan pa di umano ng mga pugante ang nakabantay na jail officer.
