admin 
ILANG araw matapos lagdaan ang Republic Act 11954, inaprubahan ng Land Bank of the Philippines (Landbank) ang resolusyon nagbibigay-daan sa P50 bilyong ambag ng ng naturang bangko sa kontrobersyal na Maharlika Investment Fund (MIF).
“It is reasonable to expect that the Maharlika Investment Fund will be up and running before the end of 2023,” ani Finance Secretary Benjamin Diokno sa isang pulong-balitaan.
Ayon kay Diokno, malaking bentahe ang pagsasabatas ng RA 11954 na nagtataguyod ng kauna-unahang sovereign wealth fund na pinaniniwalaang magpapaunlad sa ekonomiya ng bansa.
Sa ilalim ng nasabing batas, lilikha ang pamahalaan ng Maharlika Investment Corporation (MIC) na mangangasiwa sa mga gagawing pamumuhunan ng gobyerno sa iba’t ibang negosyo sa ibang bansa.
Ani Diokno, sisipa ang ang operasyon ng MIC bago matapos ang taong 2024.
Pasok sa mandato ng itatayong MIC ang pagbabalangkas ng mga estratehiya at pagtukoy sa mga imprastrakturang aniya’y magsasampa ng pera sa pamahalaan, gayundin sa larangan ng kalikasan, kalusugan at digitalization ng gobyerno.
Bukod sa Landbank, inaasahan rin ng administrasyon humugot ng pondo mula sa Bangko Sentral ng Pilipinas, Philippine Amusement and Gaming Corporation (PAGCOR) at iba pang government-owned gaming operators at mga regulatory agencies. Target din ng pamahalaan gamitin ang salaping malilikom sa pagsasapribado ng mga pag-aari ng gobyerno.
Una nang sinabi ni Diokno na tatapusin ang Implementing Rules and Regulation ng Maharlika Investment Fund bago sumapit ang buwan ng Setyembre ng kasalukuyang taon.
“We do not intend to use up the 90 days. We expect the promulgation of the IRR to be done before the end of August,” dagdag pa ng Kalihim.
