Juliet Pacot 
WALANG puwang sa kagawaran ang mga patulog-tulog lang sa tanggapan, ayon kay Department of Public Works and Highways (DPWH) Secretary Vince Dizon, matapos sibakin ang isang district engineer sa Bicol region.
Batay sa dokumentong nakalap ng Saksi Pinas, kakulangan sa road safety warning sa kalsada ang nagtulak kay Dizon para tanggalin sa pwesto si DPWH Camarines Sur First District Engineer Ramon Anselmo Calagos.
Sinisi ni Dizon si Calagos sa isang aksidenteng naganap kamakailan sa Barangay Magais sa bayan ng Del Gallego. Anang kalihim, walang sapat na road safety warning signs at traffic safety devices sa ginagawang bahagi ng kalsada.
“We need to make our people accountable. We already ordered all districts and regions nationwide na kailangan maging very very strict tayo sa standards ng safety,” ani Dizon.
“We will hold the kontratista accountable kasi responsibilidad nung kontratista ‘yon na maglagay ng tamang safety signs and meron na tayong standard na strikto. At kung ‘yan hindi susundin, buhay ang kapalit niyan in some cases.” pahabol ng DPWH chief.
