
BIGLANG kambyo ang Land Transportation Franchising and Regulatory Board (LTFRB) sa napipintong phase-out ng nasa 40,000 traditional jeep sa Metro Manila.
Ayon kay LTFRB Technical Division chief Joel Bolano, hindi naman tuluyang aalisin ang mga traditional jeep — kung magagawang panatilihin ang maayos na hitsura at kondisyon ng pamasadang tinaguriang hari ng kalsada.
Paglilinaw ni Bolano, layon lang ng programa na dumaan sa modernization ang operasyon at ang mga uri ng unit ng mga jeep na ginagamit sa bansa.
“The objective of the PUVMP (Public Utility Vehicle Modernization Program), is to modernize and change the system in the transport sector, including fleet modernization or upgrading the units,” diin ni Bolano.
Samantala, maglalabas din ang LTFRB ng hiwalay na panuntunan hinggil sa pagpapalawig ng bisa ng prangkisa ng mga traditional jeep sa bansa.
Aniya pa, pinag-aaralan pa ng LTFRB Board ang pinal na petsa ng ibinidang extension na tampok sa babalangkasing Memorandum Circular.
“We will just wait for the final date up to when the extension of their authority to operate will be. This will be part of the new memorandum circular that we will issue very soon.”
Upang mahimok na sumailalim sa PUVMP, gagabayan ng Office of the Transport Cooperative (OTC) ang mga operator at tsuper sa kanilang paglahok sa mga kooperatiba o sa pagbuo ng sarili nilang korporasyon.
“Aside from that, we also have the Project Management Office that is focused on the PUVMP. Its objective is to assist and guide stakeholders for the requirements and processes of consolidation,” dagdag pa niya.